Былаһаакканы Хамаҕаттаттан төрүттээх урбаанньыт Семен Кривогорницын тутан үлэҕэ киллэрдэ. Элбэх аналлаах былаһаакка олус ураты, сонун оҥоһуулаах. Ол курдук, манна киэҥ-куоҥ сүүрэр дорожкалаах футболлуур хонуу, саахымат, теннис остуоллара, уулусса тренажердара бааллар, былаһаакка тула өттө уотунан-күөһүнэн сандааран ыраахтан угуйа-ыҥыра турар. Тутуу бырайыагын улуус кылаабынай архитекторынан үлэлии сылдьыбыт, эдэр, талааннаах, ураты көрүүлээх Анна-Мария Степанова оҥорбут.
Алгысчыт Петр Охлопков аал уотуайах тутта, алгыстаата. Мустубут дьону Хамаҕатта нэһилиэгин баһылыга Евгений Ушницкай, Нам улууһун баһылыга Юрий Слепцов, СӨ архитектураҕа управлениетын сүрүн специалиһа Ольга Мойтохонова эҕэрдэлээтилэр, махтал суруктары туттардылар.
Улуус баһылыга Юрий Слепцов эҕэрдэ тылыгар тутууну ыыппыт дьоҥҥо махталын тиэртэ, манна ыччат түмсэн спорт араас көрүҥнэригэр уһуйулла турдун диэн алгыс тылларын анаата уонна «Олимпик» спорт оскуолатын футболга тренерэ Айхан Парниковка футбол мээчиктэрин бэлэхтээтэ.
Хамаҕатта талааннаах уола Айсиэн Васильев ылбаҕай ырыата бырааһынньыктыы эйгэни үөскэттэ. Аалай лиэнтэни дохсун ытыс тыаһын ортотугар быстылар.
Бэлиэ күн биир өрө көтөҕүллүүлээх түгэнинэн саҥа футбол былаһааккатын арыйыы буолла.
Тэрээһин «Олимпик» спорт оскуолатын футболга тренерэ Айхан Парников иитиллээччилэрэ холобур буолар дьарык түгэннэрин көрдөрүүлэринэн саҕаланна.
Хамаҕатта уонна Никольскай нэһилиэктэриттэн улуус депутаата, Нам улууһун физическэй култуура уонна спорт управлениетын начальнига Павел Иванов, Хамаҕатта нэһилиэгин наставниктарын сэбиэтин председателэ нэһилиэк Ытык киһитэ Анна Заровняева эҕэрдэ тылларын этэн туран алгыстарын тиэртилэр.
Хамаҕатта ыччатын аатыттан В.П. Артамонов аатынан саха-француз лиссиэйин 10 кылааһын үөрэнээччитэ Антон Сивцев махтал тылларын эттэ. Лиссиэй уолаттара “Доҕордоһуу ырыатын” бэлэх уунан дьон сүргэтин көтөхтүлэр, флешмоб ыытылынна.
Бастакы мээчиги сиэккэҕэ киллэрэр чиэс футбол ветерана, улуус баһылыга Юрий Слепцовка тигистэ. Убаастыыр салайааччылара мээчиги таба киллэриитин дьон-сэргэ дохсун ытыс тыаһынан көрүстүлэр.
Бу күн «Олимпик» спорт оскуолатын уонна Хамаҕатта нэһилиэгин футболга сүүмэрдэммит хамаандалара табаарыстыы күөн көрсүһүүлэрэ бэрт сэргэхтик ааста.
Саҥа былаһаакка кэлэр көлүөнэ ыччаттарбытын спорт кэрэ эйгэтигэр, чөл олоххо тардыһалларыгар олук буолуоҕа. Элбэх хайысхалаах тутуу спорт аҥардас Хамаҕатта эрэ нэһилиэгэр буолбакка, улууска эмиэ сайдарыгар төһүү күүс буолуоҕа диэн эрэнэбит.
